सडक सञ्जालसँग जोडिँदै हुम्ला


हुम्लाको तल्लो क्षेत्रमा रहेका दुई गाउँपालिकामा गाडी पुगेको छ । मुगुसँग जोडिएको अदानचुली गाउँपालिकाको श्रीनगरमा २०७६ काे फागुनमा गाडी पुगेको थियो भने यही २५ असोजमा छिमेकी जिल्ला बाजुराबाट ताँजाकोटमा गाडी पुगेको छ ।

हुम्लाका सात गाउँपालिकामामध्ये पाँच पालिका गाडीले छोएका छन् भने सर्केगाड र चंलेखी गाउँपालिकामा पुग्न बाँकी  छ । कर्णाली करिडोरअन्तर्गत सडक निर्माण सम्पन्न भएलगत्तै अदानचुली- २, ३, र ४ मा गत वर्ष फागुनमा गाडी पुगेको थियो भने ताँजाकोट- ४ र ५ मा आइतबार गाडी पुगेको हो ।

भौगोलिक रूपले विकट हुम्ला विस्तारै राष्ट्रिय सडक सञ्जालसँग जोडिएको छ । बाजुरा हुँदै हुमलाको ताँजाकोट र अदानचुलीमा गाडी पुगेपछि यहाँका बासिन्दा खुसी भएका छन् ।

कर्णाली करिडोरअन्तर्गत सडक निर्माण भएपछि पछिल्लो चरणमा यहाँका पालिका सडक सञ्जालले छुने क्रम बढ्दै छ । सर्केगाड  र चंखेली गाउँपालिकामा सडक पुग्न बाँकी छ भने नाम्खा, सिमकोट, खार्पुनाथ,अदानचुली र ताँजाकोट गाउँपालिकामा गाडी पुगेका छन् ।

काठमाडौं, केरुङ, हिल्सा हुँदै नाम्खा भएर सदरमुकाम सिमकोट गत वर्ष खाद्यान्न लिएर ट्रक पुगेका थिए । माथिल्लो क्षेत्रका  नाम्खा, सिमकोट र  खार्पुनाथ गाउँपालिकामा एकदेखि अर्को पालिकासमम गाडी सञ्चालन हुँदै आएका छन् ।

ताँजाकोट- ४  पुईमा खोला हुँदै ताजाकोट- ४ र ५ मा गाडी पुगेपछि स्थानीयवासी हर्षित भएका छन् । गाउँमा गाडी पुगेसँगै  उद्घाटन कार्यक्रमसमेत गरिएको ताँजाकोट- ४ का प्रदीप बोगटीले बताए ।    यसअघि पैदल हिँडेर बाजुरा जिल्लासम्म पुग्ने गरेका स्थानीयवासी अब घरबाटै गाडी चढेर बाजुरा तथा अन्य जिल्ला आवतजावत गरिरहेका छन् ।

कर्णाली प्रदेश, सामाजिक विकास मन्त्रालयको ५० लाख बजेटबाट दुई वर्षदेखि सुरु गरी सडक निर्माण गरिएको हो । रासस